كيف نشأ الكون | تعرف كيف نشأ الكون وكيف اثبت العلماء كلام القرأن الكريم
موضوع النهاردة عن بداية الأشياء , نشأة الأشياء
كلمة البدايات كلمة براقة جدا في الحياة وفي العلم وفي الدين، كلمة مهمة جدا
في الحياة كل موضوع مهم دايمًا نلاقي نفسنا بنسأل , هو ابتدى أزاي؟
أي شخصية ناجحة في الحياة تلاقينا دايما بنسأل نفسنا: هوا ابتدا إزاي؟
نيلسون مانديلا، تشارلي شابلن أول فصل في كتب مذكراتهم: كيف بدأ؟
البدايات مهمة جدًا في الحياة ,طيب تعالوا ننقل على الدين , البدايات مهمة جدًا وسؤال محوري في الدين , في أساسيات مش دين الإسلام، كل الأديان
من أين جئنا؟وكيف جئنا الى كوكب الأرض؟
والإجابة في الدين بتكون دايما: خلقنا الله لنعمّر الأرض لندخل الجنة
سطر صغير أوي في تلخيص الموضوع كله
خلقنا الله لنعمر الأرض لندخل الجنة , لكن إزاي بدأت الأرض؟ كيف بدأت الأرض؟
ترك القرآن للعلم أن هوا يبحث في المسألة دي , دي يلّا يا علم بقا اشتغل
لدرجة يا جماعة فيه آية شديدة الوضوح في القرآن ,بتطلب مننا أن احنا ندور في العلم كيف بدأ الخلقى..! تخيلوا ما احتقرش القرآن الإجابة الوحيدة
رغم أن فيه إجابات هنسمعها، لكن اسمع الآية الخطيرة . قال الله تعالي ..
" قل سيروا في الأرض فانظروا كيف بدأ الخلق ثم الله ينشئ النشأة الاخيرة ان الله علي كل شئ قدير "
إيه دا؟ بالوضوح دا في القرآن؟ امشوا في الأرض ودوروا , والله خسارة أن علماء المسلمين ما دوروش، الي دوّر علماء تانيين , واحنا قلنا لأ مش هندور مش عايزين نبحث , صحيح أن فيه آيات تانية في القرآن قدمت لينا كيف بدأت السماوات والأرض
لكن القرآن طلب مننا بوضوح: روحوا للعلم , روحوا للضلع التالت وابحثوا ودوروا
واكتشفوا إزاي ابتدأ الكون , تعالوا نروح للعلم .
عمرك فكرت الكون الي احنا فيه نشأ إزاي؟
نظريات كتيرة جت ونظريات كتيرة راحت
لحد ما جت نظرية فيزيائية وحيدة هيا الي اتفق عليها كل علماء الفيزياء الى الآن
وده لأن تم التحقق منها بمعادلات بقا ومشاهدات وحاجات زي كدا , النظرية دي يا جماعة الي هيا Big Bang او الإنفجار العظيم , الي أسس النظرية دي اتنين علماء
عالم فيزيائي روسي اسمه أليكسندر فريدمان , وعالم فيزيائي بلجيكي اسمه جورج لومارت , اسّسوها عن طريق أن هما قدروا يحلوا معادلات نظرية النسبية الي حطها أينشتين , خطير الراجل دا يعني عبقري عبقري
وأثبتوا أن الكون في حالة ,اسمع أثبتوا إيه؟ أن الكون في حالة إيه؟
توسّع مستمر توسّع مستمر
لحد ما جه فيزيائي تاني سنة 1929 ,اسمه إدوين هابيل ,دا أكّد الكلام بتاعهم وقال أن الكون فعلا في حالة توسّع مستمر , لأن المجرات في الفضاء عمالة بتبعد عن بعضها
بسرعة متناسبة وبصورة دائمة , أو الإنفجار العظيم ال Big Bang ,بتقول أن الكون نشأ منكمش , في نقطة واحدة تقدر تقول أنها قد حجم كورة البينج بونج , وبعدين حصل إنفجار عظيم ,خلاه يتمدد ويتمدد ويتوسع ويتوسع الي الحجم الي احنا متخيلينه الآن .
والدليل على حدوث الإنفجار ال Big Bang , أن الكون بيتمدد وبيتوسع بسبب الإنفجار دا لحد دلوقتي , ودا الي بيثبت صحة النظرية , وبالترتيب بيقولوا العلماء .
بالترتيب اتخلق: الفضاء الأول
وبعدين اتخلق من الفضاء الجزيئات والمجرات والنجوم والأرض , وبعدين خلقنا ربنا أنا وأنت كمان .
إزاي حصل ده؟
بعد الإنفجار كان الكون عبارة عن سحب كثيفة من الغاز , خلي بالكو أنا هاجي للدين بعد شوية .
حصل الإنفجار فكان الكون عبارة عن إيه؟
سحب كثيفة من الغاز , والمادة وقتها كانت غير المادة الي احنا نعرفها دلوقتي ,كان دايما المادة في ميل للتشتت والتنافر , مش ميل للتجاذب والاتحاد , لأن كان فيه حاجة اسمها المادة والمادة المضادة ,matter و antimatter ,والمادة المضادة
دي antimatter , هي المادة الي ما بتسمعش بقا لقوانين الطبيعة والفيزياء
وكانوا دايمًا بيتصادموا مع بعض , وتنتهي أن كل واحدة تنهي التانية ,لحد ما نجح شوية من المادة في البقاء , وشكلت المادة الي شايفينها دلوقتي , والي بتطيع قوانين الطبيعة أو الفيزياء , دا كلام العلماء أنا مبقلش هذا الكلام بس بقولكوا كلام العلماء .
بعد كدا بدأت قوى الجاذبية في أنها ترسي مجموعة مجموعة من جزيئيات السحب الكثيفة
, يبقى الأول سحب كثيفة أوي وبعدين فيه تنافر بين جزيئات المادة , وبعدين بدأت تتجمع شوية شوية شوية , وبعدين بدأت جزيئات السحب دي في أماكن مختلفة من الكون
وتتمركز , وتتجمع ناحية المركز , لحد ما بقى فيه كثافة كبيرة جدًا , أنها تقدر تكوّن نجم
ودا بدأ يتكون نجم ورا نجم ورا نجم .
وبالتالي تكون نجحت الجاذبية في أنها , احنا بنقول بأمر من الله , في أنها تشكّل النجوم من سحب الغاز , الموجودة في الكون وقتها , سحب وبعدين النجوم , والنجوم دي عاملة زي أفران نووية , هيا الي كوّنت كل العناصر بعد كدا، شكّلت الأرض وكل شئ عليها , أيوا بقا اتخلقت الأرض وكل حاجة عليها , بما فيهم أن ربنا خلقنا أنا وأنت من التراب, بس التراب دا كان جاي من النجوم الي انفجرت وماتت .
فيه دكتورة اسمها لوريد دوني , في جامعة كارد في انجلترا
بتقول خلي بالكو تراب النجوم المنفجرة مش زي التراب الي أنتو بتشوفوه في بيتكم
يعني التراب الي هوا ممكن نلاقيه ونقول.. لا لا لا
أمال إيه؟ دا هوا كان دخان , بالضبط زي مثلا دخان السجارة , أو.. دخان دخان، هيا بتقول , وكونه دخان دا بيخليه يمنع وصول الضوء من النجوم , وخلى الكون في بدايته الكثيفة دي معتم , كثيف ومعتم لدرجة ظلام دامس , مش كدا وبس، دا كمان الدكتور
أيمري بارتوس في جماعة كولومبيا في أميريكا
قال أن الجاذبية وصلت الأرض الأول قبل ما يوصل الضوء بفترة طويلة , بدأت برضو الجاذبية أنها ترسي مجموعة من جزيئات دخان النجوم المنفجرة , في مكان معين في الكون , وتمركزها وتجمّعها ناحية المركز , لحد ما اتشكلت النواه الأولية للأرض
تتجمع تتجمع تتجمع لغاية ما بقى فيه , وبعدين بدأت الأرض تكبر وتزيد تدريجيًا في الحجم , لحد ما وصلت للحجم الي هيا عليه الآن .
خلص كلام العلماء , أهو يعني معلومات يمكن أنت أول مرة تسمعها وأنا كمان , أنا أول مرة كنت أسمع المعلومات دي .
كيف نشأ الكون؟
حاجة زي ال Big Bang او الانفجار العظيم , وبعدين تمددت تمددت فالكون عمّال بيتوسع , وبعدين سحب كثيفة , وبعدين بدأت الأول كان فيه بينها تضاد , وبعدين فجأة بدأت المواد تتجمع بعد ما كانت متضادة , مين الي اداها الأمر أنها تتجمع؟
هو الله عز وجل الذي يقول كن فيكون
وبعدين بدأت تتجمع لغاية ما بدأ يكون النجوم , وبعدين الأول بسبب أن الدنيا كانت ضلمة جدًا , فضوء النجوم لسه موصلش , شوية حاجات سمعتوها , فتحت المصحف
وقعدت اقرأ فيه كل الآيات الي بتتكلم عن نشأة الكون , فلقيت أن فيه اشارات
في القرآن لنشأة الكون , مش بعيدة عن الكلام العلمي , لأ أنا قلت إيه خلي بالك أنا قلت إشارات , ليه أنا قلت إشارات؟ ماقلتش ليه كلام محدد ونهائي؟
لأن أنا مش عايز ألوي الآيات، أنا مش عايز نقعد نفتخر ونقول يا سلام شفتوا الإعجاز العلمي في القرآن , أنا مش عايز كدا خالص، أنا مش عايز اثبت بالعافية في الموضوع دوًّا , أمال أنا عايز اقول ايه؟ أنا ليه بقول إشارات؟
أنا بقول إشارات علشان نشوف أن فيه مراية، أن احنا مش في تضاد بين العلم وبين الدين
لكني بحياد , أشعر أن الإشارات كأنها بالحرف الواحد بتأيد الكلام العلمي .
أن دليل أن حصل الإنفجار العظيم: حالة التوسع
إنفجار فالدنيا عمالة بتتوسع , لأن المجرات عمالة بتتباعد عن بعضها بصورة متناسبة وبصورة دائمة , فلقيت الآية في القرآن بتقول " والسماء بنيناها بأيدً وإنا لموسعون "
أنا بقول اشارات
ولعل القرآن يقصد أنها تبقى اشارات عشان يسيب مساحة كبيرة للعلم , إبدع العقل البشري، إنتج , إنما هيّا اشارات بعكس حلقات سابقة قلتلكوا أهي واضحة . عشان مش عايز ألوي بس الآية حلوة أوي " والسماء بنيناها بأيدً وإنا لموسعون "..
مين كان يقدر يفسر الآية ديًّا عبر القرون الماضية؟
أنا ما اتخيلش أن حد يقدر يقول فيها حاجة لأن مكنش فيه كلام علمي يتقال فيها
وإنا لموسعون , يعني الفضاء لسه.. وبعدين كلمة واخد بالك من كلمة لموسعون , دا فيها استمرارية دا فيها استمرارية , يعني عمّال يتوسّع وهيفضل يتوسّع , الآية دي مكنش ممكن يفهمها حد إلا بالعلم , وبما أن النظرية بتقول , لأ خلي بالكو حاجة تانية، أنا بقا هفكركوا بالكلام الي اتقال واحدة واحدة .
بتقول أن الكون، هما بيقولوا أن الكون اتخلق بالترتيب , السماء اتخلقت الأول وبعدين الأرض وبعدين ربنا خلقنا أنا وأنت , فأحب أقلك أن كل آيات القرآن لما بتذكر خلق السماوات والأرض واحنا , بتقولهم بنفس الترتيب دا , مفاجأة، كل الآيات بنفس الترتيب العلمي , زي مثلا أديك آية هقلك آية واحدة كل الآيات بتعمل كدا , " ما أشهدتهم خلق السماوات والأرض ولا خلق أنفسهم وما كنت متخذ المضلين عضدا "
ربنا بيقول أنتو بتقولوا على ربنا أن هوا مش موجود؟ هوا أنتو شهدتوا خلق السماوات والأرض ولا خلق أنفسكم؟ , ليه الترتيب دا كأن اشارة , كأن القرآن بيشير بنفس الترتيب زي ما العلم بيقول , سماء وبعدين أرض وبعدين أنا وأنت , لأ حاجة تانية: كل أحاديث النبي صلى الله عليه وسلم , كل أحاديث النبي عن بدء الخلق , في البخاري ومسلم بتقول نفس الترتيب , خلق الله السماوات ثم خلق الأرض ثم خلق آدم ,قرآن وسنة
طيب أما بقية النظرية فلقيتها في الآيات من تسعة لاتناشر في سورة فصلت .
سورة فصلت دي يا جماعة لما كانت قريش بتعجز أو بتقول للنبي إيه دليل رسالتك؟
كان يقرألهم سورة فصلت , وسورة فصلت كانوا يبصوا لبعض ويقولوا؟
إيه الكلام الي هوا بيقولوا؟ كأن النبي بيقولهم لأ دا أنا مش هرد عليكوا أنتو
دا أنا هرد على الي الحدوا ورفضوا الدين ورفضوا القرآن سنة 2017
بسم الله الرحمن الرحيم
قُلْ أَئِنَّكُمْ لَتَكْفُرُونَ بِالَّذِي خَلَقَ الْأَرْضَ فِي يَوْمَيْنِ وَتَجْعَلُونَ لَهُ أَندَادًا ? ذَلِكَ رَبُّ الْعَالَمِينَ
وَجَعَلَ فِيهَا رَوَاسِيَ مِن فَوْقِهَا وَبَارَكَ فِيهَا، بارك فيها؟ البركة في اللغة يعني عمالة تزيد وتكبر
وَقَدَّرَ فِيهَا أَقْوَاتَهَا فِي أَرْبَعَةِ أَيَّامٍ سَوَاءً لِّلسَّائِلِينَ
اسمع الآية الي جاية
ثُمَّ اسْتَوَى? إِلَى السَّمَاءِ وَهِيَ دُخَانٌ
دخان؟
فَقَالَ لَهَا وَلِلْأَرْضِ ائْتِيَا طَوْعًا أَوْ كَرْهًا
ليه هما كانوا متنازعين؟ هيا المادة كانت متنازعة؟
قَالَتَا أَتَيْنَا طَائِعِينَ
هوا عشان كدا المادة اتوحدت فجأة وبدأت المواد تلتقي واتكونت النجوم والأرض
فَقَضَاهُنَّ سَبْعَ سَمَاوَاتٍ فِي يَوْمَيْنِ
وَأَوْحَى فِي كُلِّ سَمَاءٍ أَمْرَهَا
وَزَيَّنَّا السَّمَاءَ الدُّنْيَا بِمَصَابِيحَ
النجوم كانت موجودة الأول وَحِفْظًا ذَلِكَ تَقْدِيرُ الْعَزِيزِ الْعَلِيمِ
شكرَا للدكتورة لوريد دوني , لأنك وضحتلنا أن تراب النجوم المنفجر , الي شكّل الأرض والي عليها مش زي التراب الي في بيتنا , وأنتي قلتي زي دخان السجارة , أن هو دخان لأ , دا هوا ربنا بيقول في القرآن ثم استوى الى السماء وهي دخان , السماء كانت دخان؟
منين يعرف النبي صلى الله عليه وسلم كلمة زي دي؟ , وبعدين خلق الأرض صغيرة
وجعل فيها من فوقها الي بيرسّيها , وبعدين ربنا بارك فيها , وخلي بالك كلمة البركة في اللغة معناها إن حاجة قليلة تزيد وتكبر وتتضاعف .
يعني الأرض نشأت صغيرة , وبدأت تزيد في الحجم ودا معنى كلمة البركة الصحيح في اللغة العربية , وطبعًا مفيش تشبيه أسهل من , فقال لها وللأرض إئتيا طوعًا أو كرهًا قالتا أتينا طائعين , عشان يوضحلنا حالة الميل للتنافر والتشتت , وعدم الطاعة لقوانين الطبيعة والفيزياء الي كانت عليها المادة والمادة المضادة , أثناء نشأة الكون , ثم إزاي بعد كدا بدأت المادة الي نعرفها الآن هيا الي بتطيع وهيا الي بتسمع , قال لها وللأرض ائتيا طوعًا أو كرها قالتا أتينا طائعين .
كمان احب أقول للدكتور إمري باريتوس , شكرا على توضيحلك لينا أن الجاذبية وصلت الأرض الأول قبل ما يوصل الضوء بفترة طويلة بسبب كثافات الدخان وقتها , لأن القرآن قال لينا: " وجعل فيها رواسي من فوقها " , الأول وبعدين قال: قالنا في الآخر , " وزيّنا السماء الدنيا بمصابيح " , يبقى الأول الجاذبية وبعد كدا النور .
ودا معناه أن ما يرسي الأرض فعلا وصل إليها قبل الضوء , زي ما العلم بيقول قبل ما يوصل للأرض من فوق , وطبعًا مفيش أبلغ من تشبيه الضوء بالمصابيح , عشان ويضحلنا حالة الظلام الدامس الي كان تسبب فيها الدخان , عشان كدا استخدم كلمة مصابيح بتنور يدوب , بس عشان تشوف في وسط الكثافة , أنا قلت كلام كتير
ولا أدّعي أن كل الي أنا قلته كلام نهائي , ليه؟
لأنها اشارات قرآنية اشارات اشارات اشارات , طب إيه الي يخليني أقول بقا بالحرف الواحد , " قل سيروا في الأرض فانظروا كيف بدأ الخلق " , مفيش في دين من الأديان كلمة زي دي , روحوا اتعلموا عشان تعرفوا كيف بدأ الخلق , فرجعت وافتكرت وأنا صغير عمري ما كنت بفكر كدا , كنت بفكر بس أن أنا عايز أصلي وأصوم وبس , عايز أكون متدين كشاب كان عندي 19 و 20 سنة .
عايز اعبد ربنا وفرحان بكدا , ومش شايف غير فكرة العبادة ومكتش واخد بالي أن العلم
هوا النور الي هينورلي طريق العبادة فأحب القرآن أكتر , أعتقد أعتقد أن أنا عايز أوفر عليكوا يا شباب , الجهد الي أنا لفيت بيه في حياتي عشان أوصل لنضج , إن أنا محتاج التلاتة مع بعض , عيشوا بالتلاتة يا شباب، حبوّا الحياة , وحبّوا الإيمان , وحبّوا الله، اقروا قرآن كتاب ربكم , بس مش هتعرفوا تفهموا كل حاجة فيه , لغاية ما تتعلموا وتحترموا العلم , وتحترموا العلماء الي طلعولنا النظريات ديًّا , بس بعضهم ما شافش نور الإيمان، أنت خليك أشطر
أعمل التلاتة
الحياة
والإيمان
والعلم
ساعتها هتعيش أجمل حياة في الدنيا
شكرًا والسلام عليكم ورحمة الله
ليست هناك تعليقات:
إرسال تعليق